Canni De Byazi:Ümid edirəm ki, onu özümə köməkçi götürə biləcəyəm- Müsahibəbackend

Azərbaycan millisinin yeni baş məşqçisi Canni De Byazi Albaniyanın “Panoramasport” nəşrinin suallarını cavablandırıb.

Sportfan.az həmin müsahibəni təqdim edir.

– Niyə Azərbaycan millisini seçdiniz?

– Albaniyadakından fərqli və mürrəkəb şəraitdə daha bir cəhd üçün Azərbaycanı seçdim. Hesab edirəm ki, ən azından Millətlər Liqası vasitəsilə belə bir imkanımız olacaq. Qrup mərhələsi asan keçməyəcək.

– Hansı fərqləri nəzərdə tutursunuz?

– Bunu ona görə dedim ki, komandanı hazırlaşdırmaq üçün vaxtım çox azdır. Avqustun ilk günlərində Azərbaycana gedəcəyəm, sentyabrın 5-də isə oyunlar başlayacaq. Fikrimcə, yığmaya çağırılacaq futbolçularla danışmalı, onları tanımalı, nəyə qadir olduqlarını bilməliyəm.

– Albaniya yığması ilə qazandığınız uğuru təkrarlaya bilərsiniz?

– Əlbəttə, istərdim. Amma hər vəziyyət eyni olmur, fərqlənir. Ən əsası, Albaniya millisində işləmək üçün daha çox vaxtım olmuşdu.

– Ansi Aqolli məşqçilər heyətində yer alacaq?

– Ümid edirəm ki, onu özümə köməkçi götürə biləcəyəm. Aqollinin “Nyu-York Kosmos”la ilin sonunadək müqaviləsi var. Görək, alınacaqmı? Bu, mənim üçün çox vacibdir. Çünki o, Azərbaycan futbolunu yaxşı bilir və çox ciddi insandır. Aqollinin peşəkarlığı xoşuma gəlir.

– Azərbaycan millisində Albaniyadakından fərqli nə edəcəksiniz?

– Hər bir anı yaşayacağam və ən etibarlı oyunçulardan hansının müsbət nəticə qazandığını qısa müddətdə tapmağa çalışacağam.

– Albaniya millisini Avropa çempionatının final mərhələsinə çıxardığınız üçün sizdən dünya çempionatına vəsiqə qazanmaq tələb oluna bilər. Bu amil sizi təzyiq altında qoya bilərmi?

– Hər kəsin maksimumu tələb etməsi mənim üçün normal görünmür. Düşünürəm ki, indi ilk növbədə Millətlər Liqasında qrupdan çıxmalıyıq.

– Azərbaycanda millisindən gözləntiləriniz nədir?

– Daha çox taktiki diqqət, həmçinin oyun zamanı topla daha sürətli hərəkət tələb olunur.